一年一度嘅上海國際電影節係華語電影嘅盛會，每年都會有多部新片登場亮相，今年都唔例外。不少香港電影人有份拍攝嘅電影都有參展，當中包括《建軍大業》、《鮫珠傳》、《俠盜聯盟》等。
上個周末，我飛咗轉上海，參加今年電影節。星期六晚出席「博納之夜」酒會，不知不覺間，博納影業成立十八周年，我同于冬亦識咗十八年，我哋合作過很多部電影，包括嚟緊八月上映嘅鉅作《建軍大業》。
《建軍大業》係「建國三部曲」嘅第三部，亦係解放軍建軍九十周年嘅獻禮片。星期日喺上海舉行發佈會，導演劉偉強、監製黃建新及一眾演員劉燁、朱亞文、王景春、歐豪、劉昊然、馬天宇、吳樾、張天愛等齊齊亮相。
呢部電影最大亮點係由一批「小鮮肉」擔綱主演，齣戲講嘅係一九二七年南昌起義前後嘅一段歷史，佢哋飾演嘅角色全部入木三分，重現當年年輕革命先輩嘅意氣昂揚。我有睇過試片，可以同大家講，呢部電影絕對係值得期待！
除此之外，嚟緊八九月推出嘅，仲有內地年輕導演楊磊執導、陳嘉上監製嘅古裝奇幻片《鮫珠傳》，同埋馮德倫執導、劉德華監製嘅《俠盜聯盟》。不得不提嘅係，《鮫珠傳》有不少動畫後期製作，所有animations都係由我哋中國電影人自己做，絕對係一部高水準電影。可以睇到嘅係，今次我哋亮相嘅不少都係合拍片，其實經過多年發展，兩地電影合作已經愈來愈緊密，而如今嘅華語電影，融合咗國產片同港產片精髓，走向更廣闊嘅國際市場。
(刊於 頭條日報)