恭喜發財！新一年，首先祝願大家身體健康、萬事如意！
今年係狗年，狗畀大家嘅印象係活力和朝氣，正如香港嘅農曆新年各區都有唔同嘅應節活動一樣，市面上總係熱熱鬧鬧，旅客過年嚟到香港，絕對可以感受到香港動感一面。
上星期五大年初一晚上，由旅發局舉辦的「新春國際匯演之夜」於尖沙咀舉行。今年匯演嘅主題係「開年‧開運‧開心」。當晚除了有多部美輪美奐的花車外，更有二十五支中外表演隊伍，合共三十四個單位參與演出。當中，國際表演團隊與陣容更是歷來最強勁，更有唔少係世界紀錄保持者或者國際冠軍級人馬，為沿途旅客和市民送上一連串高難度嘅精彩演出。新春國際匯演之夜今年已經係第二十三屆，好開心經過各方多年來嘅努力，花車匯演已經成為一項世界級節慶活動，每年都吸引好多人觀賞同參與，當中超過一半係旅客，而透過傳媒嘅報道亦為香港帶嚟唔少國際曝光。
除咗旅發局嘅新春匯演，香港當然仲有好多精采嘅賀歲活動同埋好去處，值得旅客去體驗一下，旅發局亦都為呢啲活動積極宣傳。同時，我哋亦把握農曆新年呢個重要檔期同業界合作，希望吸引更多過夜旅客，體驗香港嘅傳統節慶特色同地道文化。睇番數字，二〇一七年訪港旅客數字穩步回升，去年全年有逾五千八百萬旅客訪港，按年升百分之三點二，過夜旅客亦有百分之五嘅升幅，當中無論內地同國際旅客，都有所增長。展望二〇一八年，旅發局將繼續聯同業界緊密合作，加強mega event和海外宣傳推廣，希望keep住旅客增長勢頭；同時亦希望市民和業界繼續發揮好客精神，讓世界各地旅客嚟到香港，都感到賓至如歸。
最後，祝願香港新一年，政通人和，百業興旺！
(刊於 頭條日報)