端午節係中國傳統節日，旅發局每年都會舉辦「香港龍舟嘉年華」，將發源自中國嘅龍舟競技，向各地旅客推廣，將中國傳統文化，傳揚世界，同時亦展現香港活力動感一面。
由旅發局主辦、中國香港龍舟總會合辦嘅「香港龍舟嘉年華」，上星期一連三日在中環海濱上演。嘉年華嘅焦點，一如以往係「香港國際龍舟邀請賽」。今年陣容好強大，有十五個國家和地區約一百六十支隊伍參賽。我哋今年仲特別加設「大灣區盃」，邀請咗大灣區入面九個城巿同埋澳門、香港，派出精英隊參賽，最後由來自深圳嘅龍舟隊奪冠。另外，今年繼續有一向好受歡迎嘅「Elite Partner扮嘢大賽」，仲有新增由茶餐廳派隊競逐嘅「港式奶茶盃」。有啲開茶餐廳嘅老友同我講，第一次同埋佢哋啲同事落場參賽﹔聽佢哋講，雖然大家都係茶餐廳同行，但都係友誼第一，不過又真係幾緊張刺激。
除咗海上，陸上嘉年華今年亦好豐富，又有兩個籃球場咁大嘅人造沙灘，仲有現場太陽傘、沙灘椅、巨型水泡，加埋維港海景，真係好似去咗海灘一樣，星期日都有唔少市民一家大細嚟到玩。而且，仲有十四架美食車同場列陣，有得玩有得食。黃昏時份，仲有音樂會，多位年青歌手同埋樂隊輪流獻唱，好似開咗個summer party一樣。
美中不足嘅係，嘉年華頭兩日天公不作美，天文台更兩度發出黃色暴雨警告，好彩經過兩日大雨，周日放晴，大家都可以盡情享受賽事。龍舟嘉年華已成為一年一度夏日盛事，我們每年都思考加入不同新元素，希望為市民仲有旅客帶嚟更特別嘅體驗，展現香港活力動感的一面。
(刊於頭條日報)