新一屆立法會選舉圓滿落幕，今屆參選名單為歷屆之冠，競爭比以往激烈，星期日投票日，多個票站到晚上十點半嘅原定結束投票時間，仍然有長長人龍「打蛇餅」等緊投票。今次選舉共有二百二十萬選民投票，創歷屆立法會選舉歷史新高，再一次顯示香港人關心社會。
星期日一大早，我同經民聯一眾黨友一齊去到香港、九龍西多個街站，為競逐連任的黨友宣傳拉票，在九龍西聽到不少街坊讃好梁美芬，認同佢堅持做實事嘅態度，有啲仲話已經投咗票畀佢，令人感動。上屆議會拉布不斷，美芬上個月同街坊一齊錄咗首《反拉布之歌》，拍埋MV放上網，反應唔錯。今次經民聯七位議員當選連任，齊齊整整重返立法會，顯示社會都認同我哋反拉布、促經濟、惠民生嘅努力。
上屆議會留畀大家最深嘅印象，相信係無日無之嘅拉布同埋罵戰，多項基建工程撥款一拖再拖，甚至到咗會期嘅最後一刻，依然就拉布爭拗不休，多條關乎民生嘅法案未能夠及時通過，實在令人可惜。今屆立法會選舉結果塵埃落定，未來四年行政立法關係何去何從，備受市民關注。
發展經濟係香港繁榮穩定嘅基石，係七百萬市民嘅生活依靠。香港有今時今日嘅發展，建基於過去幾代人歷盡風雨努力拼搏，如今面對外圍經濟挑戰，香港發展不能再放慢腳步。
新一屆立法會有更多新面孔，來自唔同陣營唔同政黨嘅議員，大家應該坐埋一齊去傾，將香港利益放在首位，放下彼此政見分歧，通力合作解決經濟、民生等不同問題，建立理性溝通嘅議會氛圍，讓社會重回良性討論。香港需要一個理性嘅立法會，大家一條心，努力拼搏，讓香港經濟民生向前走。
刊於頭條日報