幾時都話，香港係美食天堂。喺同一條街或者同一個商場，可以試盡環球美食。不過，知己知彼，啱啱喺月中，我專登搵咗個weekend飛轉新加坡，試下當地特色美食順便取下經。
落地第一晚，我就去咗試Candlenut餐廳。佢係全球第一間獲米芝蓮星嘅Nyonya（娘惹）餐廳。大家可能知道，米芝蓮指南上榜的餐廳以西餐fine-dining為多，要搵地道特色嘅餐廳並唔容易。而Candlenut就正係一間食地道 Nyonya嘅餐廳，中文叫做「娘惹」，佢嘅菜式比較新派，口味較淡，賣相亦比一般娘惹菜較為精緻。之後，我就試咗擁有米芝蓮兩星嘅日本菜Shoukouwa。呢間餐廳開業短短五個月就攞到米芝蓮兩星，佢可能係新加坡最快攞到兩星嘅餐廳𠻹。
傾談間朋友仲同我講，今年米芝蓮評選嘅新加坡星級餐廳中，有兩間係開喺熟食市場嘅小食攤檔，係首次有街頭美食躋身米芝蓮行列，其中一間是以售賣港式燒味、油雞飯麵聞名，仲要排隊幾個鐘先食到。講到新加坡傳統美食，當然唔少得海南雞飯，我都試過，只係幾蚊坡紙，真係名不虛傳，油而不膩，米飯部份是粒粒分明的長米，齒頰留香。其實喺新加坡，好多大眾化嘅地道菜式甚至街頭小吃，都好有風味。喺香港好多出色而受歡迎嘅港式小食，佢哋嘅身影都好似逐漸消隱，買少見少。
香港素有「亞洲美食之都」美譽，港式地道美食一直深受世界各地朋友喜愛。好多時旅客嚟香港，除咗係想在旅遊區試下新穎食品之外，佢哋最想體驗嘅，係香港最地道的大眾化小食：好似臭豆腐、雞蛋仔，唔少訪港旅客都要跑去試一下。我真係好希望有一日，有更多嘅港式地道美食，可以入選米芝蓮。更重要嘅係，我哋要思考如何在承傳方面多下工夫。
(刊於 頭條日報)