近年愈來愈多唔同嘅旅遊方式興起，其中一項就係深度遊。旅發局以「香港．大城小區」作為推廣策略，除咗傳統景點之外，亦帶領旅客走進特色社區，深度體驗香港嘅地道文化，讓旅客對香港有唔同嘅感受。去年旅發局首度推出「舊城中環」項目，反應唔錯，今年我哋推介九龍，特別揀咗深水埗作為第二個推廣地區。
最近，深水埗地鐵站、燈柱、電箱等已經換上咗以紅白藍帆布為主題嘅新裝，上面貼有QR Code，方便旅客搵到漫步指南。旅發局亦會以唔同途徑向海外旅客宣傳，包括透過「香港故事」展現深水埗地道的一面，又會拍攝微電影《尋覓．心水寶》，仲會同業界合作推出深度遊行程，吸引更多海外旅客嚟香港，深度體驗地道社區文化。
有朋友都問我多唔多去深水埗。其實我同深水埗好有淵源，我啱啱出嚟做嘢嗰陣，就喺呢度附近返工。喺度做過十年嘢，自自然然就對深水埗多咗認識，亦都建立咗一份特別嘅感情。因此對我嚟講，深水埗可以講得上係香港最地道嘅社區之一。
呢度除咗有好多外國旅客都知道嘅黃金商場、鴨寮街之外，仲有好多米芝蓮推介小食，仲有賣布、賣鈕扣珠仔嘅舖頭。大家可能唔知，連張叔平都係喺深水埗買布做戲服﹔仲有劉德華、梁朝偉嘅《無間道》入面嘅經典場面、同埋一啲荷里活電影，都喺深水埗取景。呢區近年仲多咗好多年輕人喺度開舖頭，發展自己嘅事業，非常值得旅客嚟探索。
上星期我同邱騰華局長同埋傳媒朋友去咗轉深水埗體驗一下，仲專程去咗添好運餐廳品嚐培哥嘅私房點心，味道一流，可以話係全世界最抵食嘅米芝蓮餐廳。要體驗香港地道特色文化，深水埗的確係一個好去處。
(刊於頭條日報)