上周日，由旅發局主辦的「香港單車節」順利舉行，今屆共有近五千名本港及國際單車選手參加，當中包括約四百位來自其他國家及地方嘅單車賽發燒友專程來港參與。
清晨五點半，參加五十公里挑戰組賽事嘅選手率先出發，挑戰「三橋三隧」。當日天氣唔錯，少少風，唔少車手都話可以發揮預期水準。今年賽道三隧三橋的次序有所調整，比賽之後有車手同我講，今年先上青馬，再過汀九至三號幹線，有一種先苦後甜嘅感覺；亦都係咁，選手開頭時更有體力應付上橋爬坡同對抗橋上側風。
有車手賽後話畀我知，賽道上每逢急彎收窄，都有專人用大聲公提醒，沿途指示牌亦清晰，覺得安排唔錯；仲有車手笑笑口話我知，佢架戰車喺起跑線一起步就甩鏈，唯有向現場大會工作人員求救，同事們都拍硬檔幫佢上返鏈，等佢最終都好彩順利起步。香港單車節愈辦愈好，實在要衷心感謝各贊助商的支持，以及特區政府的協助，亦必須多謝旅發局所有同事的辛勞付出。
至於焦點項目專業公路繞圈賽，今年獲國際單車聯盟升格為亞洲巡迴賽分站賽，係全港首個UCI 1.1級賽事，共有十七支來自全球十二個國家及地區的車隊，近一百名海內外頂級車手參加。經過二十個圈長達一百零三公里嘅激戰後，最終由UAE Team Emirates車隊的Matej Mohoric力壓群雄奪冠。
香港單車節規模比以往盛大，除了吸引幾千位本地單車運動愛好者之外，更吸引世界各地旅客和職業車手參與，一邊比賽，一邊欣賞香港壯麗景色。我相信「香港單車節」呢項深具本港特色的國際體育盛事，既有助鞏固香港作為「亞洲盛事之都」的定位，提升香港對旅客的吸引力，而本地市民又可參與其中，可謂一舉兩得。
(刊於 頭條日報)