近年香港掀起一股單車運動熱潮，嚟緊星期日，旅發局再度舉辦體育盛事「香港單車節」，今年喺多方面都有所提升，吸引接近五千名本港及國際單車選手參加。
焦點活動一定係國際專業公路繞圈賽，呢項賽事今年獲國際單車聯盟升格為亞洲巡迴賽其中一站，成為專業計分賽事，亦係全港首次舉辦的UCI 1.1級單車賽事。比賽沿尖沙咀梳士巴利道、麼地道、科學館道及紅磡繞道，全長超過一百公里，以繞圈方式進行，每圈長五點一五公里，意味着選手需要不斷掟彎兜圈，賽事相當有挑戰性，相信會好精采同刺激。專業賽事精英雲集，將有兩支世界知名職業車隊，以及十六支國家隊及洲際隊參與，包括代表香港出戰比賽的體育學院單車隊，勝出嘅車手將可獲得車手戰衣、獎金以及巡迴賽積分。
至於公眾賽事，同舊年一樣，最受歡迎嘅依然係五十公里組及三十公里組賽事，報名名額更加一早爆滿。路線方面，五十公里組會繼續橫跨六區及挑戰「三隧三橋」，但今年會先踩上青馬大橋，再到汀九橋及昂船洲大橋，希望讓更多參與者可以一嘗馳騁青馬大橋的感覺。我哋亦會擴大打氣區範圍，將終點移到梳士巴利道1881對開位置，令到更多參加者嘅親友同市民，可以到場觀戰同埋打氣。
除此之外，今年「總裁慈善及名人單車遊」亦相當有睇頭，我知道不少老友都秘密練兵，全力以赴，希望能夠推動健康生活意念，同時亦關顧本地有需要社群。
單車運動愈來愈受到歡迎，未來我哋希望可以不斷擴大規模，吸引更多單車愛好者親身來港參賽，鞏固香港盛事之都美譽，讓香港繼續成為世界焦點。
(刊於頭條日報)