旅發局舉辦嘅「香港單車節」，嚟緊星期日登場。轉吓眼單車節已經係第四年，今年吸引五千四百多位單車選手同愛好者參加，規模一年比一年大。
焦點項目係周日下午喺尖東一帶舉行的「Hammer香港站」，亦係今年歐洲「Hammer Series」最後一站，將有十一支UCI世界巡迴賽單車隊、三支職業洲際車隊以及香港隊，合共十五支強隊參加，一齊爭奪終極殊榮。一眾國際頂級車手會喺尖沙咀維港海旁在「競速賽」同「追逐賽」兩場賽事激戰，挑戰超過六十四公里路程，相信會好精采。
另一焦點，就係最受各位朋友歡迎嘅五十公里組同埋三十公里組賽事，今年參賽人數係歷屆最多，起步時間比去年稍微提前。去年有車手同我哋反映，汀九橋路面比較多碎石，所以今年我哋加派人手提前清理路面，盡量減少碎石，各位朋友比賽嗰陣要時刻留意路面情況，尤其係部份工程路段，最緊要係小心謹慎、安全至上。除此之外，今年單車節亦加入咗慈善元素，單車活動嘅部份報名費以及「總裁慈善單車遊」嘅全數報名費，將撥作慈善用途，希望推動健康生活意念。
今年我哋加強海外客源市場推廣，特別喺日本、台灣、南韓、東南亞等海外市場，聯同當地業界推出包含香港單車節嘅行程。我哋仲首次同郵輪公司合作，於東南亞推出參與單車節嘅飛航郵輪之旅，旅客享受旅程之餘，仲可以參與到單車節活動，一舉兩得。
最佳觀賞位置，專業賽事會當然喺梳士巴利道近尖沙咀海濱一帶，或者係麼地道近市政局百周年紀念花園一帶。至於50公里同30公里組方面，梳士巴利道或者終點1881對開位置，讓大家近距離觀戰同打氣。今個周日，同大家一齊盡情投入呢場單車盛事！
(刊於頭條日報)