香港樂壇就好似一個大家庭，歌手、作曲人、填詞人，大家平時都係好朋友，不過好似王菀之（Ivana）同張敬軒（Hins）咁，喺舞台上如此有默契，都幾難得。
上個周末，Ivana同Hins首次合作開concert《The Magical Teeter Totter張敬軒•王菀之演唱會2017》，一連四晚於紅館上演。開Show當然要有主題曲，今次佢哋特別合唱新作《友誼的小船》，並推出音樂EP。演唱會上，Ivana更以黑天鵝造型為觀眾帶來一段辣身舞，令人眼前一亮。我知道佢早前練舞嗰陣受咗傷，𠵱家都仲要戴住腰封，加上近日患感冒，都咪話唔辛苦。不過佢話上到舞台就忘記痛楚，要傾力演出，將最好嘅一面帶畀觀眾，佢呢種精神非常值得欣賞。
不少朋友都知道，Ivana同Hins係樂壇出名感情要好嘅一對「皇上皇后」，其實佢哋早在十多年前，啱啱出道嗰陣已經相識，當時兩人都係環球唱片公司嘅歌手，曾經一齊出過音樂專輯，可以話係識於微時。多年來佢哋有過多次合作，一直都老友鬼鬼、默契十足，喺舞台上點玩都得。就連佢哋嘅fans都希望兩人可以一同踏上紅館，為呢份友誼加冕，如今一連四場演唱會終於圓滿落幕，背後牽線嘅正正係呢份十多年嘅友誼同默契，真係十分難得。
不少歌手都希望嘗試更多不同發展方向，譬如Ivana，我知道佢除了專注於歌唱事業之外，近年亦向舞台劇、電影、電視劇等多方面發展，前途廣闊。佢二○一四年首次參與電影演出，即憑藉《金雞SSS》榮獲金像獎「最佳新演員」、「最佳女配角」等多個獎項，初次拍戲就有此成績，絕對唔容易。雖然近年兩人發展方向各有不同，不過呢份友誼依然喺度。
(刊於 頭條日報)