一年一度的香港單車節上星期日圓滿完成，今年吸引超過五千四百名單車愛好者參加，數字為歷屆最多，當中專程來港參賽的旅客約佔一成半。
星期日天未光，參加五十公里組的選手已經率先由尖沙咀出發，跨越六區，挑戰「三隧三橋」。不少選手都覺得今年賽道情況比去年好﹕雖然上橋位置比較當風，不過路面碎石情況大大改善，路線安排也順暢，加上當日天氣清涼，適合發揮，最終超過九成選手都順利完成賽事，完成率同去年相近。
我哋一直推動大灣區各市在旅遊方面有更多合作，今年特別喺五十公里組別增設「粵港澳大灣區青年盃」，邀請大灣區十一個城市共一百七十名青年人參與，希望可以促進大灣區青年交流。至於三十公里組就增設「大學盃」，本港有九間大學組隊參加，一同在昂船洲大橋上破風。將來如果粵港澳三地可以共同舉辦單車節，單車好手在港珠澳大橋上馳騁，相信感覺一定更加正！
至於焦點賽事「Hammer 香港站」，不但係歐洲「Hammer Series」最後一站，亦係UCI亞洲巡迴賽分站賽事，屬於UCI 1.1級公路賽，今年首次登陸香港，來自世界各地的15支強隊在尖東鬧市上演連場精采賽事，吸引不少旅客和市民夾道觀賽。十五支參賽隊伍要先後進行10圈「競速賽」以及五圈「追逐賽」激戰，既要比併速度，又要講求戰術同耐力，睇到專業車手全副裝備上陣，真係相當緊張刺激。最終由澳洲車隊Mitchelton-Scott力壓對手，連同之前歐洲分站賽事的成績，最終榮膺「Hammer Series 2018」總冠軍，成為終極王者，實至名歸。
踏入十月秋意漸濃，大型戶外盛事亦都接踵而來，嚟緊下星期將迎來「香港美酒佳餚巡禮」十歲生日，今年旅發局加入多項以「十」為主題的新元素，仲會有多重驚喜，期待下星期與市民同旅客齊聚中環海濱。
(刊於頭條日報)