一直以來，香港都係中西文化交匯嘅地方。就喺我中環辦公室附近，不但有現代的商業大廈，更有古色古香嘅傳統建築，以及為數唔少嘅傳統富中國特色樓宇。香港，就係一個融合古今、匯聚中西的國際都會，如果有人話香港係文化沙漠，我絕對唔會認同。獨特嘅歷史文化底蘊正是香港魅力所在，讓世界各地旅客慕名而來。近日政府計劃於西九文化區興建「香港故宮文化博物館」，並與北京故宮博物院合作，定期展出故宮珍藏，相信將會有助加快推動本港文化旅遊發展。
喺西九興建故宮文化博物館，係一件好難得嘅好事。大家知道國家對文物出口有嚴格限制，故宮博物院嘅院藏更係中國歷史文化嘅精髓，一向不會長期外借珍藏。今次故宮可與香港攜手合作，提供逾千件故宮珍寶喺香港長期展覽，當中更有首度公開嘅珍品，不但顯示國家對香港嘅重視同支持，亦可有助凸顯出香港中西文化交流薈萃嘅特點。
Art Basel喺香港辦得十分成功，唔少市民同埋旅客都慕名而至：如果我們將來可以在香港展示故宮珍藏和精采嘅西洋藝術珍品，中西合璧，絕對有助提升香港文化樞紐嘅地位。興建「香港故宮文化博物館」，不但可與西九文化區嘅M+藝術博物館等互相配合，更全面展示傳統與現代、中國與世界嘅文化藝術，形成獨特嘅世界級文化博物及藝術展覽群。文化和旅遊，更加係相輔相成。
從旅遊發展的角度來看，故宮文化博物館亦係一項重要嘅旅遊基建。近年社會掀起一股文化旅遊熱潮，不少文化旅遊景點，譬如大嶼山嘅天壇大佛、尖沙咀嘅科學館、藝術博物館和歷史博物館、以至位於沙田嘅文化博物館等等， 都是訪港旅遊嘅熱點。至於港島方面，中環及中上環都係一個好有歷史同文化藝術特色嘅地方，所以旅發局都計劃將兩區合併重新包裝，向世界各地旅客推介。我亦相信，未來故宮文化博物館落成後，將成為一個既獨特又矚目嘅旅遊景點，增強本港旅遊業嘅競爭力，吸引更多高消費嘅過夜旅客來港，這對於推動旅遊業發展係一件美事。
我知道不少業界朋友都支持同埋期待盡快建成呢個項目。對於社會上有不同意見，我相信政府日後會多加諮詢並吸納業界及公眾嘅意見，讓公眾有更多參與。期望各界心平氣和溝通，不要將事件政治化，以免將好事變壞事。
(刊於 頭條日報)