ENG

分分鐘做到PB (林建岳) – 評論文章

里約奧運周一閉幕。本屆奧運令我印象深刻的:一是中國女排,佢哋表現神勇,一路殺入決賽並硬撼「黑馬」塞爾維亞勝出,事隔十二年再次奪金,為中國贏得殊榮;二是港隊運動員,連日來表現神勇,再次於國際體育舞台上展現香港精神,令更多香港人關注體育發展,仲有小朋友話長大後希望成為運動員,要為香港爭光。明日,國家隊運動員將抵港與市民接觸,延續奧運熱潮。

運動近年係香港成為咗一個trend,亦愈來愈多mega event同運動有關。

就係上星期,一連九天由「全城街馬」主辦的「香港跑道節」喺香港CBD中環鬧市舉行。我出席上星期日嘅壓軸賽事——「香港街馬@中環2016」,為「懷舊香江5公里」的兩場賽事鳴槍。當天清晨,雖有雷暴大雨,但無減跑手熱情,起跑前大家互相cheer,非常興奮。有跑手賽後仲同我講,水戰嘅感覺唔錯,而且因為落雨令氣溫降低,喺一條五公里平坦賽道,真係分分鐘會做到PB(personal best,個人最佳時間)。

香港每年都會舉辦各類競跑活動,但礙於場地所限,為減少因為封路而帶來嘅影響,活動一般會在清晨開始,盡快結束,難有其他元素。今次「香港跑道節」將跑步與慈善、嘉年華等結合,加入本地特色,一連九日每日舉辦不同主題的跑步活動,除咗「香港街馬」,仲有跑入元創坊、永利街、蘭桂坊等大街小巷嘅「中環街後跑」;結合音樂的「敢動尊嚴2016」,仲有外國都幾興嘅啤酒派對跑Beer Run;甚至乎有生死教育意義的「盂蘭跑」等。活動有不少青年朋友及運動好手參加,乘住全城運動熱潮,更讓運動融入生活。

講到運動熱潮,旅發局將於下個月再度舉辦大型體育盛事「香港單車節」。今屆單車節報名踴躍,「50公里個人組」名額短短幾個鐘就迅速爆滿,為咗讓更多單車選手參賽,上星期我們更特別調撥多二百五十個名額到個人組。作為「香港動感10月」系列活動,我們更會將單車節連同十月在港舉行嘅其他體育盛事,包括「國際汽聯電動方程式賽車錦標賽」,以及「香港網球公開賽」等,pack埋一齊向旅客推廣,希望吸引更多旅客來港參加和欣賞各項緊張刺激嘅賽事,為香港拓展更多商機。

(刊於 頭條日報)