今個星期經民聯舉行六周年晚宴，我哋喺海洋公園萬豪酒店筵開逾八十席，感謝近千名各界嘉賓蒞臨，感謝一眾主禮嘉賓、政商界以及傳媒朋友捧場，一齊為經民聯送上祝福。晚宴上我都公佈咗一個喜訊，吳永嘉議員正式加入經民聯大家庭，同我哋一齊為貢獻國家、服務香港而繼續前行。
今年我哋移師海洋公園萬豪酒店，可能有朋友都知道，酒店係由我公司投資發展。今次可以喺自己地方舉行我哋嘅周年晚會，就好似同咁多位經民聯嘅朋友一齊返咗屋企一樣，非常親切。
晚宴表演環節，不少朋友都大展才藝，傾力演出，帶來多個精采節目。好高興與特首及一眾官員朋友一齊獻唱《獅子山下》，為晚宴掀起高潮，當然仲要感謝多位好友鼎力支持，為經民聯會務發展出錢出力。現場好多嘉賓互相selfie，我喺fb都有好多朋友upload咗好多靚相，非常盡興。
六年來，經民聯一步一腳印，積極搭建香港工商界、專業界同政府及市民溝通嘅橋樑；用務實嘅態度，同政府及社會各界尋求合作空間。經民聯嘅隊伍不斷擴大，已成為香港重要嘅建設力量。藉此機會，真係要對一直以來大力支持經民聯發展嘅各方友好，表示最衷心嘅感謝！
今年適逢改革開放四十周年，習近平主席上月會見港澳各界訪問團時，對香港在改革開放中嘅貢獻同優勢，予以充份肯定。展望未來，香港需要更加積極融入國家發展大局，經民聯將與社會各界攜手前行，繼續扮演推動者、建設者嘅角色，積極向中央同特區政府建言獻策，一齊努力將香港這個家園建設得更加美好。
（刊於頭條日報）