大型盛事一向都係我哋吸引旅客嘅策略之一。旅發局七月頭公佈嘅兩項大型盛事嘅安排，「香港電競音樂節」同埋「香港單車節」，籌備工作已經如火如荼。好似啱啱上個周四至周日一連四天，就率先進行咗「香港電競音樂節香港《絕地求生》世界邀請賽─香港區選拔賽」。
今次本地選拔賽有過百支本地電競隊伍參賽。選拔賽現場本來都準備咗鍵盤、滑鼠等等裝備，不過大部份選手都自携私家嘅專業電競裝備，話用慣嘅裝備會更加得心應手，有助取得好成績，十分專業。正式開賽前，歌手陳柏宇仲嚟咗場「一對五十」嘅PUBG mobile「示範賽」。我都有睇番Youtube感受一下，佢降落咗之後，本來都執咗兩支槍同避彈衣﹔不過唔使幾秒，就俾幾個赤手空拳不過來勢洶洶嘅對手圍攻。最後佢就「示範」咗點樣喺全副武裝之下，喺短短41秒就俾赤手空拳嘅對手KO咗，在場觀眾個個都笑到碌地。
講番正式選拔賽事，選拔賽最後一天就產生兩支勝出隊伍，佢哋已經可以率先獲得共二十萬獎金，並將於八月二十五及二十六日在「香港《絕地求生》世界邀請賽」中，代表香港，迎戰其餘十四支國際職業電競隊伍，爭奪最高榮譽。
另外一項籌備工作，就係「香港單車節」嘅網上報名。可能大家都會擔心，網上報名好多時都會出現「大塞車」﹔因此，旅發局同事特別注意網絡硬件嘅安排，以確保一切順暢。唔少組別嘅名額已經爆滿，其中五十公里組個人組別喺四個鐘內已經搶購一空，至於三十公里組亦已滿額。五十公里組賽事挑戰「三隧三橋」，而三十公里組都會登上昂船洲大橋，兩個賽事都有唔同嘅難度，單車節將會喺十月十四號舉行，各位選手都要開始準備同埋操車啦。
嚟緊我哋會繼續舉辦不同類型不同規模嘅盛事，讓旅客同埋香港市民感受香港精采之處。
(刊於頭條日報)