由旅發局主辦嘅新一輪「閃躍維港」光影匯演載譽重來，今晚會喺尖沙咀文化中心露天廣場拉開序幕。今次匯演特別加入更多精采同新穎嘅元素，除咗有豐富嘅燈光效果同3D投影技術，仲特別加入唔同嘅感官元素同互動環節，希望為旅客帶來一場別具特色嘅光影盛會。
配合旅發局「香港FUN享夏日禮」推廣，今次光影匯演內容主要圍繞夏日嘅多元化體驗，本地美食、街頭藝術等元素都會穿插係裏面，希望展現香港多姿多采嘅特色。
匯演動畫片以開心活潑嘅巨龍與雞年吉祥物同遊香港為故事主軸，巨龍、雞年吉祥物，以及地道美食家族包括雞蛋仔、菠蘿油、燒賣、叉燒包、平安包等，均會「跳」出投影幕，化身LED塑像和大型充氣公仔與觀眾見面。除此以外，旅發局仲特別喺匯演中加入激光、肥皂泡和煙霧等特別效果，希望為觀眾帶來多感官體驗和驚喜。
有得睇亦都有得玩，我哋喺現場特設「喚醒巨龍」互動遊戲，前九廣鐵路鐘樓會變身為巨型踏步機，旅客同市民可以即場參加踏步比賽，鬥快「喚醒」水池中的巨型LED飛龍，而巨龍嘅形象更加會投影喺鐘樓上。鐘樓每晚都會有唔同形象嘅飛龍出現，大家可以集齊一套十二款，再post上facebook，一齊「喚醒巨龍」。
「閃躍維港」光影匯演踏入第四年，已經成為香港旅遊嘅一大特色。滙演自從推出至今，已有超過二百三十萬觀眾觀賞。今次匯演有咁豐富嘅元素，實在好適合一家大細參與，希望大家一齊親身體驗呢場光影盛會。
(刊於 頭條日報)