旅遊對我來說，不單是公共服務，更是我熱愛鑽研嘅興趣及課題。無論為公務定係假期到世界唔同地方遊歷時，在網絡也好、報紙電視也好，一談及香港，代表香港的圖片，九成都係維多利亞港同埋文化中心、鐘樓，佢哋已經成為香港嘅地標。如果你嚟香港冇睇過維港，就真係唔係好算嚟過。尖沙咀維港一帶，最受歡迎景點，當然唔少得鐘樓同埋香港文化中心。
由旅發局主辦嘅新一輪「閃躍維港」3D光雕匯演載譽重來，今晚就喺文化中心及尖沙咀鐘樓拉開序幕。躍動的光影，強烈的節奏，簡直係視聽雙重震撼。今次「閃躍維港」3D光雕匯演以全新概念呈現，有別於以往文化中心外牆嘅平面投影，今次匯演範圍將伸延至文化中心廣場整個空間，近六十組激光將從廣場四方八面交織投射，為觀眾帶來更豐富及具層次感嘅立體視覺效果。
今次我哋更首度引入互動元素，讓觀眾「有得睇、有得玩」。尖沙咀鐘樓會變身成互動遊戲「Fun-O-meter」，大家只要去到香港文化中心廣場水池位置，按一下屏幕，就可以喺鐘樓外牆上，睇到自己嘅Fun Fun指數。同場仲有由澳洲嚟嘅DJ，着住件特製發光舞衣，喺強勁音樂燈光下狂舞，十足十派對狂熱。
唔知大家仲記唔記得，香港一四年首次推出「閃躍維港」3D光雕匯演，呢三年來，有夏日海底世界、沙灘城堡奇幻場景，有冬日聖誕精靈、聖誕鹿等不同主題內容嘅3D光雕匯演喺維港上演，吸引不少旅客及市民觀賞。其實，雪梨、東京、台灣等多個城市都曾上演立體光影show，但有朋友同我講，香港嘅光雕匯演，加上維港兩岸夜景做襯托，真係fit到爆。
近月訪港旅客走勢回穩，根據旅發局數字，六月訪港旅客跌幅收窄，來自國際市場及內地過夜旅客數字都錄得增長。我哋會繼續努力為旅客精心籌劃一連串多姿多采嘅節目，令我哋市民、各地旅客能好好享受呢個難忘夏日之旅。
(刊於 頭條日報)