以往的生日，我好多時都外遊小休，讓自己叉電之餘，仲可以見識世界各地大小旅遊景點和美食；亦希望在繁忙的公司和公職生活當中，劃出一個小空間，諗吓大計。今年生日「登陸」了，希望與以往有一點點不同，邀請了一眾好友和家人，開咗兩個小party。
第一晚party主要係同一眾政商好友聚一聚，舊雨新知，大家也暫時放下嚴肅話題，細味美食，天南地北。好友，就係就算公務極忙，也會記掛的：有好友就算突然出trip，都在外地送上祝福；亦有好友本來公務繁忙只可參加酒會，最後亦喺後半段與太太再嚟join番party，令我十分感動。同場有黎明、任賢齊、蘇永康友情客串，我都忍唔住上台同佢哋唱番幾句，在場好友不少都意猶未盡，繼續jam歌。第二晚，就係同演藝界好友同埋屋企人開party，dress code仲要係我至愛嘅golf，千嬅等更加即席獻唱。今次兩晚party都喺「好酒好蔡」開，我仲特意邀請咗旗下多間餐廳嘅星級廚師，為大家整一啲精緻菜式。當然，我都用心挑選咗一啲心水餐酒配搭，公諸同好，觥籌交錯，熱鬧非常。不過party最重要，都係大家朋友盡興。
人生，有無數驛站。六十歲，也是人生其中一個驛站。古代的驛站是歇息的中站，也是新出發的起點。我希望的，就是為所愛的地方做一點事，讓這裏成為一個更可愛的地方。
最後，借此專欄小小一角，感謝這六十年來與我同行的家人和好友。願大家天天快樂。
(刊於 頭條日報)