特首選舉圓滿結束，三位候選人分出勝負後擁抱、握手、互相勉勵，上演令人開心一幕。林鄭月娥（Carrie）以七百七十七票當選新一任行政長官，將成為首位女特首。
選舉嗰陣，我為Carrie拍過一條片，為佢助選。近年來，我牽頭搞過唔少大型活動，同Carrie有多次合作，我發現喺佢負責嘅項目中，溝通會更加暢順，效率亦更加高。可以睇得到Carrie統籌能力強，做事有承擔，亦全心全意為香港，我相信佢係一個理想嘅特首人選。
今年「兩會」上，張德江委員長提醒我哋，深圳GDP好有可能在兩三年內超過香港，希望大家多啲關心經濟，把握機遇搭上國家發展的「快車」，唔好再自己拖後腿。喺過去幾年，委員長幾乎在每一次同我哋會面中都提到港人要多啲關心經濟的說話。Carrie亦曾經喺一個論壇上提到，香港過去多年嘅GDP增長低於新加坡，佢話自己好唔甘心。呢番話講出我心聲，我相信，當大家見到我哋經濟發展速度不如周邊城市嘅時候，都會同樣感到唔甘心，香港唔應該係咁樣。
近年，香港社會政治爭拗不斷，立法會成為拉鋸戰嘅「戰場」。Carrie當選後發表感言，強調首要工作是修補社會撕裂和解開鬱結，團結社會向前行，並希望可以建立恒常溝通機制，為行政立法關係打好基礎。其實選舉嘅時候，大家有唔同意見係好正常，如今選舉結果塵埃落定，期望立法會唔同陣營、唔同政黨嘅議員，大家可以藉此契機，放下彼此政見分歧，就經濟民生等議題，與政府深入討論，切實改善行政立法關係，通力合作，讓社會重回理性討論。
Carrie嚟緊幾個月最重要嘅事情係籌組新班子，而大家最關心嘅莫過於新一屆政府如何落實政綱，發展經濟，提出更多惠民政策。我睇過Carrie提出嘅政綱，佢喺稅務、房屋、教育等方面都有很多新構想，相信未來五年，佢會團結大家一齊同行，繼續把握機遇，聚焦經濟發展，帶領香港再創高峰。
(刊於 頭條日報)