ENG

不忘初心 方能始終 (林建岳) – 評論文章

記得五年前,我同一班秉持相同理念的工商專業界人士、立法會議員、區議員同社會人士一齊,共同創辦香港經濟民生聯盟,希望能夠為建設香港貢獻力量。

今個星期,經民聯五歲生日,我哋以「成就五載,建設未來」為主題,喺灣仔會展筵開逾六十席舉行晚宴;非常感謝一眾主禮嘉賓、政商界以及傳媒朋友捧場,一齊為經民聯五周年誌慶及香港的未來,送上祝福。

晚宴表演環節,先由我哋青委會成員打頭陣,帶來精采的熒光舞龍,之後唔少朋友都上台獻唱多首金曲;最後壓軸,我哋同一眾官員朋友及現場嘉賓一齊獻唱《獅子山下》,為晚宴掀起高潮。現場好多嘉賓互相selfie,我喺fb都見好多朋友upload咗好多相,非常盡興。

不忘初心,方能始終。五年來,經民聯以「工商帶動經濟、專業改善民生」為宗旨,為香港發展出謀獻策,為工商專業界創造更好環境,為中產發聲,與廣大市民風雨同路。要感恩嘅係各界支持,經民聯一步一腳印,逐步成長。展望未來,經民聯將繼續發揮工商專業優勢,抓住「一帶一路」、「粵港澳大灣區」建設帶來嘅巨大機遇,推動香港發展,貢獻國家。

順帶一提,話咁快,仲有兩個星期就係除夕倒數,今年跨年煙火匯演係慶祝香港特區成立二十周年嘅壓軸活動,規模將會更為盛大,視覺效果豐富,更具層次感,現場仲會有演藝團體帶來精彩演出。希望二○一八年香港更加政通人和,大家幸福快樂。