尊老敬賢是潮人的傳統美德，秉承先賢美德，香港潮屬社團總會每年都舉辦敬老活動，支持特區政府「安老扶弱、改善民生」政策，關注潮籍長者生活，更為眾多市民問寒送暖，表達廣大潮籍鄉親關懷社會的愛心。
上星期六，潮屬社團總會透過各區潮人聯會，一齊舉辦「萬人盆菜 寒冬送暖」活動，潮屬朋友喺香港真係唔少，今次喺港九新界近三十個不同地方共設宴三千零八十席，邀請三萬多位潮籍鄉親共享盆菜，規模非常盛大。潮州鄉親扎根香港多年，有不少長者都超過九十歲甚至一百歲高齡，我哋特別為佢哋送上「利是」，以表祝福。活動總主場設喺堅尼地城西寧街足球場，當日天氣都幾凍下，非常感謝一眾主禮嘉賓以及政商界朋友捧場，一齊為潮籍鄉親送上冬日溫暖。
敬老，至少有兩層含意。一係尊重，尊重老人家嘅文化知識、社會經驗同愛好習慣；二係關愛，對老人家付出愛心同關心，使老人家覺得「老有所依，老有所養，老有所樂」。今次我哋喺二○一八年新年之際舉辦盆菜宴，當日我同陳幼南主席一齊跑勻港九新界，去到幾個主要會場探望老友記，希望為廣大潮籍鄉親，尤其係潮籍長者送上冬日溫暖和節日問候，延續先賢的優良傳統，把尊老敬賢的傳統精神代代相傳。
二○一八年是一個重要年頭，多項重要交通基建相繼落成。隨着港珠澳大橋即將通車，香港同大灣區嘅聯繫將愈來愈緊密；廣深港高鐵全線貫通，將香港26公里嘅高鐵網同內地二萬五千公里嘅高鐵網連接起來。呢啲利民便民措施，為香港經濟民生發展帶來出路，亦有助香港融入國家發展大局。香港嘅未來需要大家一齊努力，為造福香港，造福市民，造福鄉親貢獻智慧同力量，把溫暖帶畀更多有需要嘅人。
(刊於頭條日報)