ENG

三月,香港藝術月 (林建岳) – 評論文章

每年三月香港都有多項藝術活動,當中不得不提巴塞爾藝術展(Art Basel)。相信對藝術有研究嘅朋友都會知道,Art Basel係譽滿全球嘅當代藝術展覽會,每年於瑞士巴塞爾、美國邁阿密海灘及香港三地舉行,雲集不少大師級優秀藝術品,包括雕塑、繪畫、攝影作品等,絕對稱得上係國際級藝術盛事。

巴塞爾藝術展自二○一三年起於香港設展,今年已經係第五屆,公眾開放日會於下星期四起,一連三日於灣仔會展舉行。今年嘅展會將有二百四十二間來自三十四個國家及地區的頂級藝廊參展,其中二十九間更是首次參加。我知道Art Basel每年都積極協助藝廊培育新晉藝術家,亦特別注重地方特色,好似香港展會咁,分為「亞洲視野」、「藝術探新」、「藝聚空間」等不同專區,當中半數參與既畫廊都喺亞洲及亞太區有展覽空間,目的係希望為區內藝術家提供更多展示平台,同時亦吸引世界各地的知名藝廊匯聚亞洲,互相交流。

Art Basel奠定咗香港喺區內藝術市場的中心地位,每年藝術展都為香港帶來不少訪客,包括各地藝廊參展商及收藏家等。有見每年三月香港都有好多藝術文化盛事舉行,所以旅發局特別將三月打造為「香港藝術月」,推廣多項文化藝術盛事,除了Art Basel,還包括「第45屆香港藝術節」、「SOHO畫廊遊」等。

除此之外,適逢今年係香港特區成立二十周年,旅發局特別揀選咗二十張能表達「香港鮮為人知的藝術秘點」嘅照片,譬如由傳統工業區「變身」成為文青「新蒲點」、現有多個藝術團體和藝廊進駐嘅黃竹坑;中上環、深水埗一帶的街頭塗鴉等。旅發局會透過國際傳媒發放呢啲相片,等世界各地人士都可以從不同角度感受香港獨特的藝術氛圍同社區面貌。另外,旅發局亦配合「香港藝術月」,同業界合作推出一些介紹中區豐富藝術特色嘅導賞團,希望鼓勵更多旅客感受香港嘅藝術特色。

旅發局向旅客推介香港別具藝術氣息嘅一面,希望豐富旅客嘅體驗,讓旅客喺參觀頂尖藝術展之餘,亦能感受到香港充滿本地特色的藝術文化。

(刊於 頭條日報)