每個城市都有自己嘅文化特色。香港，就係一個融合古今、薈萃中西嘅國際大都會，我哋嘅傳統文化更別具特色，縱使時間流逝，仍然歷久常新。不只是古老，而且十分時興。
由香港中華廠商聯合會、新家園協會及香港文化產業聯合總會聯手舉辦嘅「開心幸運里」嘉年華，將於七月一日起一連兩日喺中環海濱舉行，通過音樂會、懷舊街、美食攤檔、攤位遊戲，以及展覽等多元化活動，展示香港傳統文化。今次活動仲特別預留門票，派發給弱勢社群，邀請來自不同群體嘅朋友一齊參加，希望藉此凝聚社會、團結共融，營造一個滿載香港人集體回憶嘅嘉年華。
我哋將會場佈置成六十至八十年代嘅香港舊街，將好多已經消失嘅舊街景、建築物、工廠大廈、交通工具等，一一呈現於大家眼前。現場仲會有各種各樣嘅攤檔，售賣傳統經典街頭小食同埋創新潮吃，仲有久違嘅叮叮糖、糖葱餅、缽仔糕、白糖糕等，各式各樣懷舊地道小食都可以喺呢度搵到，大家不妨通過味蕾去感受香港美食文化精髓。
另外，除咗有得玩有得食，仲有視聽感受。七月一日晚上，黎明、張智霖、陳小春三位巨星將會嚟到中環海濱，大唱經典廣東歌，七月二日就有多位實力派歌手同大家一齊細味流行經典。其實，香港本地創作嘅Cantopop造就了獨有嘅音樂風格，至今在亞洲以至在全世界嘅華人社會仍大受歡迎，成為了歷久不衰嘅廣東歌文化經典。
成個嘉年華真係可以由朝玩到晚。今次「開心幸運里」位處中環海濱，大家知道，在香港慶回歸嘅晚上，大家仲可以喺呢個最佳位置，欣賞到維港上空璀璨嘅慶回歸煙花匯演。
在璀璨煙火夜空下，傳統舊街，配上維港兩岸摩天大廈嘅繁榮，香港經典傳統文化加上現代都市魅力，造就了香港嘅繁榮穩定。我一向都話，香港今天成就，經歷過不同年代香港人嘅努力，實在得來不易，值得好好珍惜。
(刊於 頭條日報)