明天就係香港回歸祖國二十周年，回顧過去二十年，香港成功落實「一國兩制」方針，喺前進嘅路上克服種種困難，取得令人矚目嘅成績。
今個星期，「香港回歸祖國二十周年成就展」喺北京國家博物館開幕，展覽以「同心創前路 掌握新機遇」為主題，從一幅幅珍貴圖片、圖表模型同埋多媒體互動內容等可以睇到，香港有今時今日嘅發展成就，係建基於過去幾代人嘅努力拼搏，實在得來不易，要好好珍惜。
回歸二十周年嘅大日子，一定要大眾同樂。嚟緊周末，「開心幸運里」嘉年華將喺中環海濱舉行。我哋特別將會場佈置成六十至八十年代嘅「香港舊街」，加上各式懷舊小食，仲有聽日由黎明、張智霖、陳小春組成嘅「幸運輪唱團」，以及後日由呂珊、葉振棠、尹光、劉雅麗、麥潔文、莫旭秋獻唱嘅「懷舊金曲輪住唱」，連串精采活動盡顯香港傳統文化特色。聽晚，大家更可以喺最佳位置欣賞到慶回歸煙花匯演。
「開心幸運里」活動，係希望可以藉此凝聚社會、團結共融，營造一個滿載香港人集體回憶嘅嘉年華。傳統舊街配上維港兩岸摩天大廈嘅繁榮，香港經典傳統文化加上現代都市魅力，更加凸顯出香港今日嘅繁榮穩定。
我一直都講，香港嘅未來，需要我哋大家一同努力打拼，更要薪火相傳。
相信新一屆政府會團結各界一齊同行，繼續把握機遇搭上中國內地發展嘅快車，聚焦經濟發展，帶領香港再創高峰。
(刊於 頭條日報)