ENG

「美酒佳餚巡禮」紛呈新潮流 (林建岳) – 評論文章

每年十月底,唔少人同我一樣,都會期待住由旅發局舉辦嘅「香港美酒佳餚巡禮」。Wine & Dine Festival今年會喺十月二十六號至二十九號,再次載譽歸來,喺中環海濱活動空間舉行。今年活動將有約四百個美酒和美食攤位,我哋特別加入多項新潮流元素,希望為遊客同市民帶來更豐富嘅美酒美食及快樂。

今年我哋繼續網羅多國美酒,五大美酒展區將會展出來自二十一個國家和地區的佳釀。去年嘅特色雞尾酒大收旺場,今年活動首度推出「氣泡盛薈」展區,帶來多款潮流氣酒、新興氣泡雞尾酒以及香檳等。新增嘅「Robert Parker Wine Advocate」展區,所有美酒均經由品酒權威 Robert Parker嚴格挑選。除此之外,今年仲特別新設「The Concept Store生活良品店」,展出創意及時尚餐具家品,啱晒追求生活品味嘅人士。

好酒當然要配美食。美食方面,今年都好豐富。我哋搵嚟城中十大型格餐廳,當中包括米芝蓮三星食肆,提供各式精采美食。今年「品味館」將會有兩項特別品味活動,一個係「名廚美酒佳餚晚宴」,由五位來自芝加哥、新加坡等嘅國際及本地頂級名廚主理,只開放一晚;另一個係「A Taste of Culinary Stars」,由洲際酒店四間餐廳聯手合作,供應中西美食以及精緻甜點,將於下星期日分三場供應,非常值得一試。

今次盛事是「香港盛宴11月」嘅頭炮活動,旅發局會於多個客源市場積極宣傳,仲會聯同海外業界及航空公司於十三個客源市場,推出以美酒佳餚為主題的旅遊產品,希望可以吸引更多過夜旅客,繼續鞏固香港「亞洲盛事之都」形象。

(刊於頭條日報)