電影《建軍大業》將於嚟緊星期日喺灣仔會展舉行香港首映禮，八月三號正式上映。呢部電影係繼《建國大業》、《建黨偉業》之後，「建國三部曲」嘅第三部，亦係香港同內地電影業界，為慶祝中國人民解放軍建軍九十周年作出的莊重獻禮。
《建軍大業》由香港導演劉偉強執導、內地導演黃建新監製，講嘅係一九二七年南昌起義前後，革命先輩們喺極其艱苦嘅環境下建軍嘅一段歷史。今次演員陣容相當龐大，我哋特別挑選一批年輕實力派演員擔綱主演，佢哋飾演嘅角色全部入木三分，重現年輕革命先輩嘅意氣昂揚。
除此之外，氣勢磅礡嘅爆破場面，亦係呢部電影嘅一 絕對係落足工夫，尤其係喺拍攝「三河壩戰役」一場戲時，劇組親手搭建結構複雜嘅戰壕，數百位演員「打」了一個月，爆破組每日埋下嘅炸點均有數百個之多。喺拍攝「南昌起義」時，實拍爆破火舌直衝三層建築物樓頂，再加上連環炸點組合爆破所帶來的視覺衝擊，相信一定可以為觀眾帶來親臨其境嘅觀感刺激。
今個月初，國家第一艘航母遼寧號編隊訪港，展現解放軍「威武之師、文明之師」的風貌，掀起香港社會一股撲飛潮，也牽動了無數港人嘅愛國心。今次《建軍大業》再現人民解放軍在極其艱苦的環境下，成軍、建軍、強軍的輝煌歷史，相信可以加深市民對解放軍歷史嘅認識。可以同大家講，呢部電影絕對不容錯過！
(刊於 頭條日報)