超hit電競音樂節 (林建岳) – 評論文章

「香港電競音樂節」今天起一連三日喺會展登場!旅發局去年首辦電競音樂節,今年載譽重來,成為唔少青年人暑假嘅壓軸盛事。

電競音樂節將上演三項國際頂級賽事,分別係「英雄聯盟王者回歸世界邀請賽2018」,以及兩項全新賽事「ZOTAC CUP MASTERS《CS:GO》盃賽全球總決賽2018」和「香港《絕地求生》世界邀請賽」,三項大賽總共有過百位來自香港及其他地區的電競選手參賽,當中好多都係殿堂級人馬。

旅發局與多個網絡平台合作,以多種語言網上直播三項國際電競賽事對戰盛況。我知道籌備的同事,事事做足,從設置器材、安裝電腦、到檢查各種應用程式,每個環節緊密跟進。為確保比賽公平及順利舉行,每天賽事都有觀察者及具經驗的裁判坐鎮。大會亦為來自世界各地的隊伍安排翻譯,十分細心。

至於場內嘅體驗專區亦會呈獻最新電競、電玩產品,仲有最新VR遊戲試玩。除此之外,一連三日活動中仲會有多場音樂表演,我哋請到來自韓國嘅DJ Soda,以及Gin Lee、Mr. Wally、李拾壹、徐加晴等年輕歌手,分別於電競主舞台和體驗專區為入場朋友送上精采表演,大家真係要留意。

近來我同朋友傾開,大家覺得「電競」同「打機」係兩回事。其實,電競已成為運動競技項目,入行門檻頗高。有選手同我講,佢哋要接受密集式訓練,反應要快,思路要清,亦要了解自己和對手打法;更要與隊友保持良好溝通。有唔少選手都要接受體能訓練,先可以應付比賽的體力要求。可見電競根本與其他運動項目無異。上周六開幕嘅印尼耶加達亞運會亦新增電競為示範項目,並於下屆杭州亞運正式成為獎牌項目,可見電競發展愈來愈受正視。

旅發局希望藉着這股席捲全球的電競熱潮,吸引更多年青旅客訪港,感受香港充滿動感和活力的一面。各位喜愛電競嘅朋友,記得把握呢三日時間,到香港電競音樂節親身體驗一下。

(刊於頭條日報)