花車巡遊迎豬年 (林建岳) – 評論文章

仲有唔到兩星期就踏入豬年,今年旅發局會繼續喺大年初一晚舉行新春國際匯演,為旅客同埋市民帶嚟一個熱熱鬧鬧嘅晚上,感受香港動感一面。

今年新春國際匯演繼續以「開年 開運 開心」為主題,有花車、有表演。今年展出嘅九部花車體積將會較以往大,視覺上更加悅目,喺花車上面將會見到各式各樣嘅豬仔,迎合豬年,仲有好受大人細路哥歡迎嘅卡通人物。大家沿途觀賞花車嘅同時,仲可以玩吓由優質旅遊服務協會推出嘅手機AR遊戲,有足金金豬、現金禮券等豐富禮物,讓大家過個肥年。

至於表演,今年將有二十五支中外表演隊伍參與演出,當中十三支來自唔同地區嘅表演隊伍,包括曾參加電視節目America’s Got Talent、着住高踭鞋跳舞而爆紅嘅菲律賓男子組合「Junior New System」,由美國遠道而來嘅hip-pop芭蕾舞蹈團等,佢哋嘅表演片段喺社交平台上「洗晒版」;當然唔少得嘅就係有多位世界紀錄保持者嘅組合,送上各種高難度並極具娛樂性嘅表演,到時一定唔會令大家失望。

新春國際匯演由一九九六年開始舉行,眨吓眼,今年已經嚟到第二十四屆。好開心經過各方多年來嘅努力,花車匯演已經成為一項世界級盛事。咁多年嚟,匯演一共吸引咗幾百萬人次嚟到現場觀賞,仲有近三萬名嚟自三十個唔同國家同埋地區嘅表演者,專程嚟到香港演出。整個匯演為香港累積帶嚟約一百億嘅宣傳效益。當然,匯演亦都係唔少旅客同埋香港市民年初一嘅必備節目。

大年初一晚上八點,巡遊隊伍將由尖沙咀香港文化中心廣場出發,途經廣東道、海防道及彌敦道,以喜來登酒店為終點,匯演開始之前仲會有熱身派對,記得一齊喜迎豬年!

(刊於頭條日報)

訂閱經民聯訊息

Please enter your email:



佔領中環 劉皇發 張俊勇 張華峰 房屋 拉布 政制 政制改革 教育 施政報告 旅遊 普選 林健鋒 林建岳 梁君彥 梁美芬 盧偉國 石禮謙 經民聯 經濟 規劃 證券 證券業 財政預算案 金融