臥底惡鬥，幾時都係港產片中一個主要題材。電視劇《使徒行者》年前首播好評如潮，近排深夜重播仍然大受歡迎。????家電影版緊接上映，原班人馬，當中靈魂人物佘詩曼同許紹雄（Benz雄）當然繼續攜手合作，電影版仲新加入了張家輝、古天樂（古仔）同吳鎮宇嚟個演技角力，而電影版的主題曲《行者》，今次就請嚟草蜢演繹。
由電視劇到電影，《使徒行者》仍然係由文偉鴻執導，一氣呵成。唔同嘅係，今次外景一眾演員同製作團隊要遠赴本屆奧運舉辦地方巴西里約熱內盧實景拍攝，動作連場，亦有多場槍戰場面。喺古色古香的南美街頭槍戰，很有異國風情，我睇試片嗰時，真係覺得自己睇緊Jason Bourne。
戲入面有一場動作戲喺當地貧民窟拍攝，團隊要由保安護送去拍攝場地。團隊返嚟之後同我講，有次拍拍吓，大家都聽到遠處傳來「嘭嘭」聲。古仔問：「呢啲係咪堅槍聲？」導演搶答：「唔係啦！放炮仗啫！」「吓？巴西邊有炮仗？你咪玩我啦……」後來團隊知道原來對面山頭有人開緊槍，不過都有一段距離。好在成個製作團隊都整齊返嚟。
今次《使徒行者》電影版，係本地劇本，用香港及內地演員，在巴西等地取景，更在港澳、內地、新馬、澳紐，以及美加等多地上映，希望將香港嘅電影，帶畀更多世界各地嘅觀眾。近年本港電影業挑戰重重，不過，「一帶一路」就為本港電影發展帶來曙光，乘勢衝出香港，走向內地及海外市場，不但有助吸引更多投資，亦有助吸引年輕人投身電影行業，繼續創作出更多優秀作品。
(刊於 頭條日報)