千嬅成就跨年傳奇 (林建岳) – 評論文章

楊千嬅加入了寰亞已經有十個年頭,我一直見證住佢在演藝事業同埋人生道路上嘅成長。千嬅上月開始一連十一場喺紅館開show,橫跨聖誕同新年檔期。今次千嬅如願開跨年show,除夕夜踏入零時一刻,仲同全場萬人倒數迎接新年。

演唱會星期二晚圓滿完成,我都有去現場為佢打氣。尾場由余文樂擔任表演嘉賓,同千嬅一齊合唱佢哋喺電影《春嬌救志明》中唱過嘅歌曲《當我想起你》。講開又講,啱啱香港票房有限公司公佈二○一七年本港電影票房,《春嬌救志明》榮登去年香港電影十大票房榜首,可喜可賀。今次演唱會對千嬅嚟講,絕對係一次挑戰同突破;大家知道,千嬅每晚concert都勁歌熱舞又打側手翻,由開場《繼續努力》,到中段表演《Wonder Woman》,令觀眾愈睇愈high。千嬅同我講,佢為咗今次開show,提前三個月特訓,甚至喺演唱會期間keep住操練,就係希望可以發揮到極限。

有睇過千嬅fb短片《起碼我做過》嘅朋友都知道,佢特訓包括舉重、跳繩、拳擊、攀石,操練重型器械等,的確非常tough。千嬅話,經過今次特訓深深體會到放棄是一件很容易的事,盡自己所能堅持下去,雖然有困難、艱辛,即使結果未如理想,至少付出了努力。

千嬅付出百分百努力回報歌迷,愈戰愈勇,觀衆亦愈睇愈high!恭喜你丁太,你為自己做咗個跨年傳奇。呢個畫面,令我諗起香港人永不言棄嘅拼搏精神,為了不同目標努力打拼。

(刊於頭條日報)