仲有幾日就係二○一八年元旦，旅發局每年都會舉辦除夕倒數，同大家一齊迎接新年，送上第一份祝福，到今年已經係第十一年。今年嘅除夕倒數將於星期日晚舉行，係旅發局慶祝香港特區成立二十周年嘅壓軸活動，別具意義。
香港嘅除夕煙火音樂匯演，一直係世界矚目嘅跨年活動之一，每年都吸引好多國際媒體報道。今年嘅匯演將會比往年更加精彩，規模更加盛大，煙花畫面闊度比去年增加超過三成半，而且煙花同煙火會以唔同高度發放，營造多層次嘅視覺效果，整個畫面將極之繽紛璀璨。另外，今年匯演首次引入歐洲得獎製造商嘅煙花，為觀眾帶嚟設計新穎嘅煙花圖案，呈上一幕「魔法星塵」，以仙子在維港夜空撒落閃爍的星塵為設計概念，寓意為香港送上新年的祝福。
除咗煙火匯演，當晚喺尖沙咀天星碼頭，仲會有澳洲演藝團體「Strange Fruit」的表演。「Strange Fruit」屢獲殊榮，曾於二○一四年俄羅斯索契冬季奧運會表演，今次表演項目「Deco-Sphere」更是全球首次公開演出。表演者將會喺直徑約兩米嘅巨型球體上，以戲劇、舞蹈及馬戲雜技獻上精湛演出，相信會非常精彩。除此之外，晚上十一點開始，中環、金鐘、灣仔一帶五座建築物樓頂，將會每隔十五分鐘發放「許願流星」煙火，四色煙火分別象徵甜蜜、健康、常樂和富足，大家記得抓緊機會許個新年祝願。
回顧二○一七年，香港旅遊業穩步增長，今年頭十一個月整體訪港旅客數字，無論是內地或海外旅客，都錄得增長。展望新一年，要保持呢個增長勢頭，就需要不斷提升香港旅遊吸引力和競爭力，豐富旅客嘅訪港旅遊體驗。最後，祝願新一年，香港更加繁榮璀璨。
(刊於 頭條日報)