香港雖然係彈丸之地，不過，喺每個區入面，都有佢獨特嘅生活文化，亦都有講唔完嘅故仔。而旅客去到一個地方旅行，好多時候都鍾意捐窿捐罅，深入體驗地道文化。中環係香港開埠初期最早開發的地區之一，雖然現時該處摩天大廈林立、金融商業機構聚集，但當中仍有唔少地方依然保存着往昔風貌。中環可以話係香港歷史發展的重要標記，係本港融合古今、薈萃中西嘅寫照。而喺上星期，旅發局就啟動咗「舊城中環」推廣計劃，透過重新整合中環同上環一帶嘅多元特色，吸引旅客更深度地體香港獨特嘅生活文化。
「舊城中環」所覆蓋嘅範圍，東起雲咸街、南至堅道、西連水坑口街、北接皇后大道中，並以本地其中一條最早建成的街道—荷李活道為主軸。配合「舊城中環」推廣，旅發局亦特別推出五條主題漫步遊路線，分別凸顯區內歷史建築及地標、藝術文化、美食、時尚生活等因素，鼓勵旅客探索該區富有特色嘅歷史古蹟同地標、廟宇、藝廊、老字號、潮流小店、餐廳同酒吧等種種類型不同，但卻完美並存的好去處。希望旅客走過這些漫步遊路線，從不同角度深度體驗香港的地道特色，感受中環嘅獨特風貌。
配合這個推廣計劃，旅發局特別為旅客印製28萬本「舊城中環漫步遊」路線指南，並同時設有網上版本，供旅客瀏覽下載。除此之外，旅發局亦與業界聯手，推廣多個介紹中環豐富特色的導賞團，介紹中環獨特多元嘅吸引力及鮮為旅客所知嘅好去處。另外，為進一步方便自助遊旅客，旅發局也於中環多個地點陸續增設QR Code，提供「舊城中環」及各推介路線的有關資料。旅發局的「舊城中環」推廣現時只係剛剛起步，之後仲會陸續加入新元素，使內容更加豐富。旅發局亦有計劃，未來會將呢個推廣概念，推展至本港其他地區，希望鼓勵更多旅客深入香港多元魅力，以及發掘唔同地區嘅有趣故事。
另外，我亦想借這個機會與大家分享，三月份嘅旅客數字，整體升咗百分之八點八，而過夜旅客就升咗超過一成，當中內地同短途市場都有雙位數嘅增幅。至於綜合今年首季旅遊業嘅表現，無論整體同過夜旅客均較去年同期上升，內地及國際市場也錄得升幅。我哋好開心見到呢個成績，亦會繼續同各界緊密合作，好好把握增長勢頭，希望為香港帶來更多過夜旅客。
(刊於 頭條日報)