香港素有「盛事之都」美譽，近年旅發局積極推廣「盛事旅遊」，發展體育盛事係其中一個重要方向。
「2017香港哥爾夫球公開賽」（Hong Kong Open）昨日拉開序幕，一連四日於粉嶺高爾夫球會舉行。自一九五九年首屆賽事至今，Hong Kong Open已踏入第五十九屆，係香港歷史最悠久嘅體育賽事，亦係亞洲頂級職業哥球賽事之一。今年參賽球手絕對係非常強勁，包括大師賽冠軍、西班牙球星Sergio Garcia，里約奧運金牌得主、英國球星Justin Rose，衞冕冠軍Sam Brazel，本地球手張雄熙等，仲有超過三十位亞巡賽冠軍同歐巡賽好手來港參賽，高手對決，相當有睇頭。
Hong Kong Open每年都可以吸引國際球手及球迷齊集香港，今年活動作為慶祝香港特區成立二十周年認可活動之一，觀眾可以免費參加頭兩日嘅活動。我去現場睇過，除咗打波睇波之餘，仲有得玩、有得食，觀眾區內特別準備了音樂表演、藝術坊以及兒童遊玩區等，熱愛哥球運動嘅一家大細嚟都啱。
發展體育盛事，係推廣香港嘅方向之一。旅發局已連續多年舉辦大型盛事「香港單車節」、「香港龍舟嘉年華」，同時亦積極支持各項不同體育盛事，包括香港網球公開賽、香港國際七人欖球賽、國際賽馬錦標香港國際賽事，以及去年啱啱落戶香港嘅Formula E電動方程式錦標賽等，就係希望通過發展同支持更多體育盛事，吸引更多來自世界各地嘅旅客。
將體育賽事package成旅遊盛事，相信有助吸引更多旅客慕名而至，讓更多世界各地的運動好手和過夜旅客嚟到香港。今年Hong Kong Open就獲得大型體育事務委員會認可成為一項「M」品牌活動，協助提升香港作為亞洲體育盛事之都嘅形象，鞏固「盛事之都」地位。
(刊於頭條日報)