ENG

為「架己冷」驕傲 (林建岳) – 評論文章

回歸以來,每屆奧運結束之後,中央都第一時間安排運動員訪港,與市民近距離接觸,分享佢哋嘅喜悅同心路歷程,今次也不例外。上個周末,國家隊奧運精英運動員一連三日訪港,市民紛紛排隊撲飛,一睹運動員風采,喺香港再次掀起奧運熱潮。

星期六晚,特區政府喺灣仔會展中心筵開十九席,歡迎訪港嘅奧運精英,我亦有出席晚宴。晚宴現場播放長約六分鐘的比賽精華片段,再現一眾國家隊運動健兒喺里約奧運賽場上嘅精彩一刻,並以女排隊長惠若琪奪金一下扣殺作結,現場掌聲雷動。諗返起睇直播嗰陣,見到女排硬撼「黑馬」塞爾維亞勝出,事隔十二年再次奪金,的確好興奮。

三日行程緊張,一眾精英運動員不辭辛勞,連日來到訪不同社區、學校、商場等,與市民面對面互動交流。兩位潮籍金牌得主傅海峰及林躍,星期一專程去到香港潮商學校同學生分享經驗,仲一齊打羽毛球、跳大繩,我都有去撐場支持。不少學生爭住同佢哋selfie留念,林躍就鼓勵大家,追逐夢想係先苦後甜,每個人都走在追夢嘅路上。佢哋仲話,每次去到世界各地比賽,見到同胞在場打氣,異國他鄉可以感受到「架己冷」(自己人)嘅支持鼓勵,真係好感動。

今屆奧運港隊運動員亦表現神勇,再次展現香港精神,令到社會更加關注體育發展。香港與內地在體育方面其實早有合作,港隊李慧詩嘅教練沈金康正是來自內地,為香港成功培養多位單車選手。我哋好多小朋友都鍾意體育,希望長大可以成為運動員,如果兩地可以有更多合作,一齊培養青少年,發掘佢哋嘅潛能,相信將來會有更多香港運動員登上奧運頒獎台,為國為港增光。國家隊和港隊無分彼此,無論邊隊奪得獎牌,都值得我們驕傲,因為大家係「架己冷」!

延續全城運動熱潮,嚟緊第二屆「香港單車節」九月二十五日登場,而將於明年二月舉行嘅「渣打馬拉松2017」今個月亦開放公眾報名,七萬四千個名額等住大家。各位運動好手係時候熱下身,參加新一輪體育盛事,一齊努力讓香港體育可以走得更遠。

刊於頭條日報