香港絕對係美食天堂，不但港式地道美食琳瑯滿目，世界各地嘅菜式亦都應有盡有。熟悉我嘅朋友都知道，我向來鍾意到處搵美食，比較大型食肆，有時身處鬧市之中嘅小餐館反而更加精緻、更具特色。不過近年一些出色而受歡迎的餐廳，可能因為成本壓力等原因，逐漸消隱、買少見少，十分可惜。
灣仔曾經有一間以星馬菜聞名嘅餐館，我都係多年熟客，佢嘅海南雞飯絕對係食過返尋味，可惜餐廳喺一年多前結業。呢間舖嘅店主兼大廚鍾樹棠（Billy）以前是設計師，後來自己出嚟開餐廳，煮得一手好菜，對星馬菜更是特別有研究。佢曾經出任過行政總廚，亦做過家廚，來頭絕對唔簡單。最近我成功邀請Billy再次出山，合夥喺灣仔重開餐廳「老巴剎廚房」（OldBazaarKitchen）。
「巴剎」喺馬來文係市場、市集嘅意思，新加坡「巴剎」有售賣新鮮肉菜嘅「濕巴剎」，也有類似美食中心嘅「乾巴剎」，每日都人頭湧湧。「老巴剎廚房」都係走大眾化平實路線，座位以散枱為主，希望可以容納更多顧客。除此之外，今次新店設計裝潢加入新風格，牆上貼上充滿香港特色嘅黑白舊照；餐廳設有一間廂房，如果同一班老友喺度輕談淺酙，可以自成一國，私隱度都唔錯。
菜式方面，以東南亞fusion菜為主，我哋亦去搵唔同食材，嘗試更多新嘅菜式。我同Billy都對食物質素十分有要求，新鮮食材都唔會留過夜。新舖開張之後我去食過幾次，招牌菜有原隻去骨海南雞配一鍋香草砂鍋飯，香氣四溢，足夠一家大細嘅份量。除此之外，仲有手拆鮮蟹肉凍菠菜、香葱羊腩排、花雕酒浸鵝肝再配以餅乾佐食等，款款菜式都十分值得推薦。
如果係平時中午食晏，整碗咖喱崩沙腩麵已經十分滿足。可以喺一間餐廳食到東南亞菜同潮粵美食，真係有種身處新加坡「巴剎」嘅感覺呢。
(刊於 頭條日報)