ENG

《春嬌救志明》大收旺場 (林建岳) – 評論文章

要拍好一齣電影唔容易,要拍一齣好嘅續集就更難。唔單止要有一氣呵成嘅劇本,仲要一眾台前幕後等方方面面嘅努力和配合。繼《志明與春嬌》、《春嬌與志明》之後,去到今次第三集《春嬌救志明》,依然大收旺場,呢段與香港人風雨同路走過七年嘅愛情故事,繼續獲得觀眾認同。

由彭浩翔執導,千嬅、樂仔領銜,原班人馬打造的《春嬌救志明》,上映短短三個幾星期,香港票房衝破三千萬元,更加突破了第二集《春嬌與志明》嘅票房。為了今次電影宣傳推廣,一眾演員連日奔波,穿梭於香港與內地不同城市,跑咗過百場謝票。前幾晚,包括彭浩翔、千嬅以及一班演員谷祖琳、邵音音、林兆霞、陳逸寧等筵開十九席舉行慶功宴,雖然男主角樂仔嚟唔到有啲可惜,不過見到呢個成績,大家都好開心。導演彭浩翔仲攞《春嬌》出現過專食細路女的「趷趷剛」大講笑話。

其實對比起今次的票房成績,我更加高興嘅係,本地題材、本地製作的影片可以再次得到大家認同,可以將屬於香港人嘅愛情故事,帶畀港澳、內地以至海外觀眾。一直以來,香港影視娛樂發展蜚聲國際,雖然近年電影業發展面對重重挑戰,但可以睇到,港產片依然有市場和發展空間。

我之前喺專欄都講過,港產電影的發展就好比拍續集一樣,關鍵在於傳承和創新。

我哋不但需要吸納年青新血,培養幕前幕後年青電影人才,創造出更多影視作品,更加需要開拓市場,培養更大的觀眾群。

整體而言,港產電影發展非常倚重本地市場及海外拓展,其中以亞洲為最大的出口市場。如今國家「一帶一路」發展戰略,為文化產業發展帶來新的機遇,相信香港電影業發展亦可以從中受惠,藉此開拓更為廣闊的市場,獲得更多發展空間。

(刊於 頭條日報)